Sämmilij aalmuglâšpeeivi 6.2.2017 Sämimuseo ja Paje-Laapi luándukuávdáš Siidast algâttep juhlođ čyeti-ihásij Suomâ. Peivi álgá Siida šiljoost liipupaijeetmáin tme 8.50, mon maŋa ohjelm juátkoo ain eehid räi. Siida lii ávus tme 8.30–19.00 já čáitálduvváid piäsá nuuvtá ubâ peeivi.
Iđedispeeivi Säämi ellee arkkâdâh lekkâmtilálâšvuotâ tuálloo Siida auditoriost já tot oovdânpuáhtoo tme 9.30 já 10.30. Arkkâdâhân láá nurrum radio-ohjelmeh digihäämist kuulmâ sämikielâin.
Nuorttâlâš kulttuur Siida juhlepeeivist uáinoo uánihis fiilmâin auditoriost tme 12 ja 15.30.
Suomâ ruttâministeriö asâttâm Suomâ jiečânâsvuođâ juhleive juhlelävdikodde uárnee Sämikulttuur-juhleruuđâ vuávám kištottâllâm. Kištottâllâm kulluuttem tábáhtuvá Siidast tme 14.15.
Ehidispeeivi tme 16 auditoriost lii Anarâškielâ e-sänikirje -oovdânpyehtimtilálâšvuotâ. E-sänikirje máttá sujâttiđ saanijd, tobdá táválumos čäällimfeeilâid já ocá saanij kevttimohtâvuođâid čaallum teevstâst. Taažâ arktisâš ollâopâttâh já Sämitigge láá olášuttám tom ovtâspargoost.
Säämi muusikakatemia uáppei muusikpuddâ kulloo Siida pajekeerdist tme 16.30.
Siida valdučáitálduvâst tuálloo nuorâi já škovlâlij cocktailtilálâsvuotâ povdejum kuosijd tme 13–14.30. Ton ääigi tuáivup, ete iäráseh uápásmuveh mulsâšuvvee čáitálduvâid teikkâ tuálih kähvipuudâ Ravadâsviäsu Sarritist. Tobbeen puáhtá uástiđ ärbipurrâmâš lahcâkáhhoin tme 11–15 sehe juhlekäähvi aalmuglâšpeeivi liäibumušâin ubâ peeivi.
Peeivi ääigi Siida pargeeh teivih kuosijd čáitálduvâin. Puáđi savâstâllâđ já koijâdiđ aasijn, moh lahtojii čáitálduvâid, Siidan teikâ Siida pargei pargoid.
Juhlepeivi nohá sämmilij aalmuglâšpeeivi já Suomâ luándu peeivi juuhlán Siida muotâteatterist. Juhle teeman láá kuovsâkkâsah já ohjelmist lii filmâ, muusik já tanssâ. Ohjelm álgá tme 18 já pištá suullân 45 minuttid. Tilálâšvuotâ lii olgon, nuuvtba toho kannat kárvudâttâđ lieggâsávt. Muotâteatterist lii faallâmnáállieggâ säppi já uccâ hersku.
Tábáhtus uárnejeijeeh láá Sämimuseo já Paje-Laapi luándukuávdáš Siida oovtâst Säämi máttááttâskuávdážin, Aanaar kieldâin, Yle Sápmijn, Sämitiggijn, Taažâ arktisâš ollâopâttuv Giellateknoin já Oulu ollâopâttuv Giellagas-instituuttijn, Suomâ Ruttâpáájáin, Aanaar aalmuglâšopâttuvváin já Ravadâsviäsu Sarritijn.
Tärhis ohjelm kávnoo siida.fi -siijđoi kalenderist.
Lassetiäđuh:
Kirsi Ukkonen, eromâšvuávájeijee, Paje-Laapi luándukuávdáš
0400-479 986 teikkâ [email protected]
Pia Nikula, museoassistent, Sämimuseo Siida
040 621 2663 teikkâ [email protected]
Siidassa toimivat yhteistyössä Saamelaismuseo ja Ylä-Lapin luontokesus Siida sekä Ravintola Sarrit.
© Koodiviidakko Oy - Y-tunnus 1939962-1