Njála suodjaleapmi lea ožžon 2,3 miljovnna euro ruđa EU:s. Interreg-Aurora ruhtadeami vehkiin eiseválddit, universitehtat ja luonddusuodjalanorganisašuvnnat Suomas, Ruoŧas ja Norggas sáhttet joatkit guhká joatkašuvvan njála suodjalanbarggu.
Ruhtadeapmi sihkkarastá hui áitatvuloš njála suodjaleami ovdii dahkkojuvvon barggu Suomas, Ruoŧas ja Norggas gitta jagi 2026 lohppii.
Dál mieđihuvvon ruhtadeami vehkiin joatkit lihkostuvvan suodjalandoaimmaid: njála lassebiebmama dahje biebmanautomáhtaid ávkkástallama meahcis, njála vearrámus gilvaleaddji riebana bivdima duoddariin ja gárddiin šaddan njálaid luoitima lundui. Aktiivvalaš suodjaleami haga njálla lea áitojuvvon jávkat Fennoskándia guovllus.
2000-logu álggus njálat ledje Suoma, Ruoŧa ja Norgga guovlluin 40–60 njála. Njálaid mearri lea lassánan dahkkojuvvon suodjalandoaimmaid dihtii sullii 550 njállii.
– Mihttomearrin lea 1000 ráves njála jagis 2035. Vai beassat dan mearrái, suodjalandoaimmat fertejit joatkašuvvat, muitala luonddusuodjaleami sierraáššedovdi Tuomo Ollila Meahciráđđehusa Luonddubálvalusain.
Meahciráđđehusa Luonddubálvalusat vástida njála suodjaleamis Suomas.
Ođđa áššin njálaid suodjaleamis dahkat njálaid dearvvašvuođadárkkistemiid.
– Čuovvut njálaid dávddaid ja parasihtaid baikačájánasaid vehkiin. Ruoŧas ja Norggas leat leamašan dáhpáhusat, main gáittát lea leavvan riebaniin njálaide. Gáitága dihtii njálaid veadjin hedjona ja vearrámus dilis dat sáhttá dagahit ealli jápmima. Dasgo riebanat lebbejit njálaide dávddaid, mii boahtit testet maiddái bivdojuvvon riebaniid dávddaid várás laboratorias, Ollila dadjá.
Meahciráđđehusa oassi EU-ruhtadeamis lea bealle miljovnna euro. Ruđa vehkiin Meahciráđđehus joatká njála lassebiebmama, bivdá riebaniid guovllus, čuovvu máddodaga ja čoaggá njálaid dearvvašvuhtii laktásan čájánasaid.
Maiddái olbmo doaimmat leat áitta njállii. Duottarguovlluin olbmo lundui guođđán borramušbázahusat leat áitta njállii, dasgo borramušbázahusaid borrá dávjá njála vearrámus gilvaleaddji rieban.
– Mii dahkagoahtit aktiivvalaš čuvgehusbarggu ášši birra boahttevaš jagiid áigge. Mihttomearri lea oažžut sihke duoddariin ássi báikkálaš olbmuid ja vánddardeaddjiid doaibmat bázahusaiguin jierbmás vugiiguin. Rieban ávkašuvvá ovdamearkka dihtii guliid čoliin maid guolásteaddjit guđđet meahccái dahje johtolagas jápmán ealliid ráđuin, dadjá prográmmahoavda Petteri Tolvanen WWF:s.
WWF Suomi doarju Meahciráđđehusa dahkan suodjalanbarggu Suomas.
Mielddusin fuođđokámeragovva njála beasis Suomas 2023. Govva: Meahciráđđehus ja WWF
Lassedieđut mediai:
Meahciráđđehus: luonddusuodjaleami sierraáššedovdi Tuomo Ollila, tel. 0400 241 448
WWF Suomi: prográmmahoavda Petteri Tolvanen, tel. 0400 168 939
Naalinpentuja riistakamerakuva kuva Metsähallitus ja WWF.png
Koko: 1,36 MB Tyyppi: png Resoluutio: 981x796Naalinpentuja riistakamerakuva kuva Metsähallitus ja WWF.png
Koko: 1,36 MB Tyyppi: png Resoluutio: 981x796
Meahciráđđehus lea stáhta fidnolágádus, man divššu vuolde lea goalmmátoassi Suoma eana- ja čáhceguovlluin. Meahciráđđehusa mihttomearri lea luonddu árvvu ja oktasaš opmodaga vásttolaš ovddideapmi sohkabuolvvaid badjel. 1200 Meahciráđđehusa bargi sierra guovlluin Suomas vástidit guovlluid suvdilis ávkkástallamis, dikšumis ja suodjaleamis – sierra dárbbuid ja vuordámušaid oktii heivehemiin.
Meahciráđđehusa Luonddubálvalusat fállá suvdilis vuogi návddašit Suoma čábbámus luonddus. Suodjalat árvvoleamos luonddu ja vástomet vuolde leat riikamet álbmotmeahcit, luonddumeahcit ja earát stáhta suodjalanguovllut, davvi meahcceguovllut ja máŋggat fuopmášahtti historjáčuozáhagat.
© Koodiviidakko Oy - Y-tunnus 1939962-1