Lappi guvlui eanet ealggabivdolobit go diibmá
Suoma fuođđoguovddáš lea mieđihan boahtte čavčča ealgabivdui Lappii 9 346 bivdolobi. Lobit lea mieđihuvvon 40 % eanet go diibmá. Diibmá lobit mieđihuvvojedje 6 676.
Čavčča 2017 meahcástanbadjái mieđihuvvon bivdolohpemearri vuođđuduvvá meriide, maid Lappi guovllu fuođđoráđđi giđđat 2015 ásahii Lappi ovcci ealgadoalloguvlui. Ulbmilmearit leat sierra guđege ealgadoalloguvlui ja fámus golbma jagi. Ásahuvvon ulbmilmearit lea buot uhcimusat Davvi-Lappis ja buot stuorimusat Mátta-Lappis. Mannán meahcástanbaji maŋŋá dálvit nálli lei ásahuvvon ulbmiliid siste earet Máttaoarje-Lappis guovllus 8 ja Kolari, Pello, Muoná ja Gihttela guovllus 5. Dál mieđihuvvon bivdolobiid veagal sáhttá bivdit 11 000. Ovddit meahcástanbajis Lappis godde 7 438 ealgga.
Luondduriggodatguovddáža (Luke) dieđuid mielde Lappis lea leamaš stáđis ealganálli jagi 2011 rájes. Dien áigodagas ealggaid mearri lea dálvit molsašuddan sullii 16 000–18 000 ealgga gaskkas. Luondduriggodatguovddáža mielde ovddit jagi náli sturrodaga árvvoštallamis ledje máŋggain guovlluin eahpesihkkarvuođat ja dan Luke ávžžuhii váldit vuhtii vearuhanplánas. Lappi ealganális ožžo lassedieđuid vel dálvit 2017 dahkkojuvvon helikopterrehkenastimiid maŋŋá guovlluin 5 ja 9. Earenoamážit ealgadoalloguovllus 5 girdimiid maŋŋá gávnnahedje leat eanet ealggat go maid ledje árvvoštallan. Dál mieđihuvvon bivdolobiin figget geahpedit ealggaid dain guovlluin, gos leat eanet ealggat go ásahuvvon ulbmil ja dain guovlluin, main mearri lea ulbmilrájá badjeosiin dego Nuorta-Lappi ealgadoalloguovllus 6 ja Posio ja Ranua ealgadoalloguovllus 9. Mieđihuvvon lobiiguin geahččalit doalahit ealggaid dagahan vahágiid govttolaš dásis, váldit vuhtii guovlluid earenoamášvuođaid go dikšot ealganáli ja seailluhit ealganáli ealásin ja dakkárin, ahte bivdu lea vejolaš.
Ealgalobiid lei vuosttas geardde vejolaš ohcat elektronalaččat. Lappi guovllus elektronalaš ohcan váldojuvvui giittihahtti bures atnui. Oktiibuot 460 ohcamušaš sullii 95 % sáddejuvvui elektronalaččat. Ealgasállašiid ja meahcástusa áigge áicojuvvon ealggaid sáhttá almmuhit Oma riista -bálvalusa bokte dego diibmáge. Suoma fuođđoguovddáš sávvá, ahte meahcásteaddjit merkešedje bálvalussii meahcástusa oktavuođas áicojuvvon ealggaid dárkilit ja rávvagiid mielde, vai ealganáli árvvoštallamii geavahuvvon materiála livčče eanet. Čavčča ealgabivddu vuosttas badji álgá vuosttas geardde olles Lappi guovllus čakčamánu 1. beaivve. Vuosttas badji nohká 15.9. olles Lappis. Nubbi badji álgá ragatráfáiduhttima maŋŋá golggotmánu nuppi lávvardaga 14.10 olles guovllus. Ohcejogas, Anáris ja Eanodagas meahcástus nohká 30.11. Eará guovlluin Lappis meahcástus nohká 31.12.
Lassedieđut:
Sami Tossavainen, Fuođđohoavda, Suoma fuođđoguovddáš
029 431 2304, [email protected]
Urpo Kainulainen, Fuođđoplánejeaddji, Suoma fuođđoguovddáš
029 431 2252, [email protected]
Hirvitalousalueiden tavoitekannat 2015_2017.jpg
Koko: 1,63 MB Tyyppi: jpg Resoluutio: 3507x4960Hirvitalousalueiden tavoitekannat 2015_2017.jpg
Koko: 1,63 MB Tyyppi: jpg Resoluutio: 3507x4960© Koodiviidakko Oy - Y-tunnus 1939962-1